ASAGA únese ás protestas do día 18 en Bruxelas para reclamar unhas políticas agrarias máis xustas

Representantes da Asociación Agraria de Galicia —ASAGA— uniranse este xoves día 18 ás protestas en Bruxelas en defensa dunhas políticas comunitarias que realmente poñan en valor a agricultura. ASAGA únese así a outras entidades como a Asociación Agraria de Jóvenes Agricultores ASAJA, que teñen xa confirmada a súa participación.

A xornada de reclamacións, cuxo punto de partida estableceuse no Boulevard Albert II (preto da estación Gare du Nord) ás 12:30 horas, está convocada polas principais organizacións representativas do sector primario, Copa e Cogeca. En concreto, as entidades denuncian as propostas inaceptables da Política Agraria Común posterior a 2027, que se están a deseñar na actualidade e que carecen de puntos unificadores, así como do financiamento axeitado.

Ademais, as organizacións alertan de que a política comercial aplicada pola Unión Europea está en clara desvantaxe para o sector agrícola europeo. Este é o caso co acordo negociado co Mercosur que, se nada o impide, será asinado o próximo sábado 20 en Brasil. Fronte a isto, desde as principais asociacións e entidades pídense normas equitativas e transparentes, que axuden a protexer aos sectores máis sensibles.

Por último, Copa e Cogeca apuntan cara á necesidade de simplificación normativa, mellores regulacións e seguridade xurídica para as persoas que viven do campo.

ASAGA apoia a visión que se quere transmitir desde Copa e Cogeca e que se basea no carácter esencial do sector agrícola para a seguridade e a soberanía de Europa. Coas medidas actuais que se potencian desde Europa podería chegarse a un grave erro estratéxico, tal e como sustenta ASAGA. Advírtese unha dobre actitude: mentres a nivel de discurso gábase á agricultura polo seu carácter esencial, as accións e propostas da Comisión apuntan a un retroceso da ambición agrícola común da Unión Europea.

O percorrido da mobilización ten previsto rematar na Praza de Luxemburgo ás 15:30 horas. Agárdase que, en total, se sumen unhas 10.000 persoas, pertencentes a arredor de 40 organizacións, na capital comunitaria.